India-Canada in inkalpawhna leh pem luhna kawng ṭha zawk siam tum

India leh Canada ram aiawhte chu Thawhṭanni khan mipui leh mipui inkara inpawhna ṭha leh nghet zawk a awm theihna tur leh, inkalpawhna ṭha a awm theih dan tur ngaihtuahin an inbia.

India-Canada Migration and Mobility Dialogue hi New Delhi-ah neih niin, ministry of external affairs-a Secretary for consular, passport, visa and overseas Indian affairs Sripriya Ranganathan leh Canada deputy minister of immigration, refugees and citizenship Ted Gallivan-ten an kaihruai a ni.

Ram pahnihte inbiakna kaltlang hian inremna huang hrang hrang, hmalakna tur leh thawh dunna turin a huam chin tur tihfelna Term of Reference (ToR) an siam fel nghal a ni. Thawh dunna ṭha a awm theihna tur chuan mipuite inpawhna ṭha siam chu thil pawimawh hmasa a nih thu thuchhuah siamah an tarlang.

Thawh dunna a hlawhtlin leh zual theihna turin kumtin inbiakna hi Joint Working Group on Migration and Mobilty thlawpna hnuaiah neih an remti bawk. Zirlai, hna thawktu, professional, leh business visitor-te tana thawh dunna kaltlanga samkhaina thlen chu inbiakna hian a tum ber niin, inbiakna neih leh tur chu Canada-a nghah an remti bawk.