India-in nipui khawlum lutuk vangin hmun hring ṭha 5.6% chan tawh

Sik leh sa danglam chhoh dan zirchiang a, a ven dan kawng daptu pawl Climate Trends chuan ramchhunga nipui khawlum a zual zel dan zirchianna "Assessment of Green Cover Dynamics and Their Influence on Summer Temperature across India Using MODIS Land Cover and ERA5 Reanalysis Data" a neih aṭangin India chuan a ramchhunga hmun hring awmnate aṭangin hmun 5.6% anchan tawh niin a tarlang.

Ramchhunga boruak lum chho zel avanga hnim hring hmun tam tak chu an khawro tawh tih an hmuchhuak a ni. Hmun hring awmna tlakhniam nasatna hmun an zirchiannah hian, boruak lum lam chu 0.26 degree celsius in a pung tih an hmuchhuak bawk. Hei hi hnim hring bakah thing leh mau awmna hmunte tihchereu nasat a nih vang nia sawiin, khawlum zual chhan pawh a nih thu an tarlang.

Climate Trends chuan kum 2001 aṭanga 2025 chhung khan ramchhunga hmun hring awm zat chu 5.6% in a tlahniam tih an hmuchhuak. Ram pum huapa hmun hring awm ṭhinte chu 36.95% aṭangin 31.35%-ah a hniam tawh a ni. Hetih lai hian khawpui hmasawnna hna thawh leh ramngaw ṭhiahnate chu 63.05% aṭangin 68.65% in a pung chho thung.

Zirchianna hi satellite data leh evapotranspiration-te hmanga boruak awmdan zirna aṭanga kalpui niin, ramchhung boruak awmdan leh hmun hring tlakhniam dante an zirchiang a ni. Climate Trends chuan hmun hringte humhalh an ṭul zia leh tihchereuin khawlum zualna a thlen theih dante sawiin, India-in harsatna a tawh zui theih phah dante an tarlang bawk.