INDIA bloc-in CEC ban phutin 'Mock Impeachment' huaihawt dawn

Eptu party intelkhawm, INDIA bloc chuan ramchhung hmun hrang hranga electoral roll ennawnna Special Intensive Revision(SIR) kalpui danah thil fel tawk lo awm nia an hriat avangin, Election Commission of India hotu chief election commissioner (CEC) Gyanesh Kumar bang turin an phut chhunzawm zel. Kumar ban a nih theihna tura nawrna leh sorkar tihelna turin Zirtawpni, October 30 khian CEC Kumar 'mock impeachment' chu party president Mallikarjun Kharge inah neih a ni dawn.

Ruahmanna hmasaah chuan he mock impeachement hi sorkar enkawl Ashok Hotel leh Ramlila Maidan-ahte huaihawt tum a ni a, mahse, heng hmun hman dilnate hi hnawlsak an nih leh tak avangin Congress hruaitu Kharge chenna Rajaji Marg-ah sawn a ni leh ta zawk a ni. Hei bakah hian INDIA bloc chuan November 1 ah Ramlila Maidan-ah an thil phut nawrna atan kawngzawh pui 'Mega Rally' huaihawt an tum bawk.

Congress chuan CEC Kumar mock impeachment huaihawt an tumna hmun phalsak an nih loh chungchangah BJP kaihhruai sorkar laipui chu bei zuiin, prime minister Narendra Modi leh home minister Amit Shah te chuan an fa chuam, Gyanesh Kumar hum an tum vang a ni, an ti.