Lok Sabha Speaker-in AIADMK MP 26 suspend

Lok Sabha Speaker Sumitra Mahajan-i chuan Nilaini khan All India Anna Dravida Munnetra Kazhagam (AIADMK)  MP 26-te chu House laiah chhuak khawm a, rorel an tihbuai chhunzawm reng avangin rorel ṭum nga chhung atan a suspend. 

Tamil Nadu party, AIADMK member-te ho rorel inkhawm ṭan a nih veleh House laiah chhuak khawmin, Cauvery lui-a Karnataka lama Mekedatu dam siam tum duh lohna an lantir nghal ṭhin a, he dam siam hian an state-a loneitute tan nghawng ṭha lo tak a nei dawn niin an sawi a ni. Speaker-in a khap pawha an au bengchheng chhunzawm zel vang leh, rorel thei loa an siam avangin suspend an ni ta a ni. 

AIADMK hruaitu M Thambidurai chuan suspend an nih chhan chu inthlan a hnai tawh a, BJP hian Karnataka-ah hnehna chan an duh a, hei vang hian Karnataka-a Mekedatu dam project pawh a pawmsak a ni, a ti. Lungawi lohna an lantir chu an tihtur reng a ni tih sawiin, an thil phut chungchangah sorkar chuan engmah chhanna a pe duh lo niin a sawi. 

Nilainia Rajya Sabha inkhawm pawh Tamil Nadu party member-ten an aubuai hle a, House chairman M.Venkaiah Naidu chuan AIADMK leh DMK member-te chu House aṭanga chhuak mai turin a ngen hial a ni.