Rahul Gandhi-an debate neihpuiah PM a cho
Congress president Rahul Gandhi chuan Prime Minister Narendra Modi chu Rafale fighter jets deal chungchangah minute 20 chhung debate neihpuiah a cho.
Nilaini-a Parliament rorel inkhawma Rafale deal chung-chang sawiho a nih hnua chanchin thar lakhawm-tute a kawmnaah hei hi sawichhuakin, Rahul Gandhi chuan sorkarin Rafale deal a siam chungchangah PM hian a hmachhawn ngam lo niin a sawi.
Rahul Gandhi chuan Supreme Court pawhin inremna siam a nih dan chhui chiangtu tur Joint Parliamentary Com-mittee din a ni lo ang tih pawh a sawilang lo tih a sawi. Kumina Lok Sabha inthlanpuia Congress in hnehna an chang anih chuan he inremna siam anih dan hi an chhui chiang ngei dawn tih a sawilang bawk.
Gandhi chuan Rafale fighter jet lei tum chu an dodal lo a, aircraft ṭha tak a ni tih pawh an hriat thu a sawi a, mahse inremna siam dan chu PM Modi hian sumdawng lian Anil Ambani-an a hlawkpuina turin a lo siam danglam a ni, a ti. Inremna siamdan an sawisel chungchang House-a an sawichhuah chu inremna siamna tur thuthlukna siamtu PM Modi leh Defence Minister Nirmala Sitharaman-i ten sawifiah lo a, Finance Minister Arun Jaitley-an a sawifiah chhan a zawt leh bawk.
Central-a BJP thawhpui, Shiv Sena pawhin Rafale deal chhui chiang tura JPC din chu an thlawp thu a sawi. Shiv Sena chuan langtlang sorkar kalpui an tum a, hlauh tur an nei lo niin a sawi a, sorkar chu a dik anih chuan chhui chian hlauhna tur a awm lo a, thu dik tak chu a lo langchhuak mai dawn niin a sawi.
Union minister hlui pahnih Yashwant Sinha leh Arun Shourie bakah advocate Prashant Bhushan-te pawhin Nilaini vek khan Supreme Court-ah December 14-a Rafale deal chungchanga thutlukna a lo siam tawh chu ennawn leh turin an ngen. Petition thehluttute hian court chuan sorkar laipuiin thudik tawk lo a sawi behchhanin thutlukna hi a siam niin an sawi a ni.
Supreme Court hian Rafale deal chungchanga thil dik tawk lo a awm nia sawia petition lut hrang hrangte chu nikum December 14 khan ngaihtuahin, heng petition lutte hi a hnawlsak vek a ni.