UNGA-a ralthuam khuahkhirhna tur putluh India-in thlawp lo

United Nations General Assembly New York-a Thawhṭanni liam taa neihah, Pakistan leh Belarus te put luh draft resolution 'General and Complete disarmament: Conventional arms control at the regional and subregional level' tih chu pharhin, regional leh subregional-a nuclear ni lo ralthuam hrang hrang khuahkhirhna tura rawtna siamah India leh Israel chuan a thlawp lo lamah vote an thlak.

Draft resolution hi member ram 180 chuan an thlawp a, India leh Israel chauh hi a thlawp lo lama vote an ni. UN-a India permanent mission first secreatary Anmol Sher Bedi chuan ralthuam khuahkhirhna tura conventional arms control kalpui chu ram bung hrang hrangah chauh hman tur ni loin khawvel puma harsatna thlentu a nih zawk thu a sawi. Ralthuam khuahkhirhna chungchanga commission hi kum liam taa kaihhruaina hrang hrang a lo pawm tawhte tarlangin, kum 1993-a pawm tawh 'guidelines and recommendations on regional disarmament', kum 1999-a pawm 'guidelines on conventional arms control and disarmament' leh a pawm hnuhnunber kum 2017 ami 'recommendations on confidence-building measures in conventional weapons' te a tarlang. "Tun hma pawha lo sawi ho tawh, hman ṭangkai bikna tur awm thil ni si lo a sawi hona neih leh ngai hi kan hrethiam lo a ni," a ti.

Hei bakah Bedi chuan defence huanga intluk tlang taka regional leh subregional a kalpui tum a nih dan chu India-in a a thlawp loh thu sawi lang bawkin, venhimna chungchang khuahkhirhna chu geopraphical ramri anga khuahkhirh theih a nih loh thu a sawi.