Wuhan-a India mi awmte lakchhuah dan ngaihtuah

China rama novel coro­navirus leng chuan zual lam a pan zel avangin he hri hmuh­chhuahna, Wuhan city leh Hubei province-a India mi awmte lakchhuah dan tur chu India leh China official-ten an ngaihtuah mek. 

China-a Indian embassy hotute chuan Thawhṭanni khan China foreign ministry official-te meeting neihpuiin, Hubei province aṭanga ram dang mi awmte lakchhuah dan turte an sawiho a ni.  

Wuhan khuaah hian India mi zirlai 700 vel an awm a, an zinga a tam zawk hi medicine zirlai an ni. Anni bakah Wuhan leh a chhehvela university hrang hrangah India aṭanga kal zirlai eng emaw zat an awm bawk. Zirlai tam zawk hi chuan Chinese New Year holiday a nih avangin Wuhan hi an chhuahsan hman a, tunah hian zirlai 250-300 vel chu he khawpuiah hian an la awm nia hriat a ni. He khawpuia cheng, Pakistan zirlai 2,000 chuang pawhin hruaichhuah dan ngaihtuah turin Pakistan sorkar hnenah an ngen bawk. 

China thuneitute chuan hri leng darh zel tur venna atan Wuhan leh khawpui dang 12-te kalpawhna chu a khuahkhirh  mek a, Wuhan khuaa chengte phei chu phalna nei lo chuan he khawpui hi chhuahsan lo tura tih an ni bawk. 

China ram aṭanga rawn lutte chu airport-ah enfiah zel niin, mi 30,000 chuang enfiah an ni tawh. Union health ministry chuan January 1 hnu lama China rama zinte chu khawsik, khuh leh thawk lama harsatna an nei a nih chuan an awmna aṭanga hnai ber, health facility-ah in enfiah tir thuai turin a ngen. 

Union health ministry adviser, Dr Shaukat Ali chuan Kerala state-ah mi 430 chuang chu virus hi an kai venthawn thilah an chenna inah enfiah zui tura tih an nih thu a sawi. Kerala-a khawpui pathuma rinhlelh thila mi pasarih dah hrante chu test neihpui an nih hnuah an zinga paruk chuan virus hi an kai lo tih fiah a ni tawh a, pakhat result chu la nghah mek a ni, a ti. 

Nimin aṭang khan Thiru­vananthapuram airport-ah novel coronavirus vei leh vei lohte endikna tur, screeing facility pawh dah nghal a ni. Delhi-a RML hospital-ah China aṭanga rawn haw, mi pathumte chu virus an kai mai thei nia hlauhthawnna a awm avangin enfiah tura dah hran an ni. Mumbai-ah mi pakhat dah hran niin, Chandigarh hospital-ah pawh mi pakhat chu dahhran a ni bawk. 

Union health secretary Preeti Sudan chuan Nepal ramri bul state panga - Uttarakhand, Uttar Pradesh, Bihar, West Bengal leh Sikkim chief secretary leh police hotute chu hri leng mek venna kawnga an inbuatsaihnate ennawn leh, fimkhur zual turin a chah.