Brazil-a BRICS summit hmang turin PM Modi zin

Brazil-a Itamaraty Palace-ah BRICS summit vawi 11-na chu zanin aṭangin naktuk thleng neih tur a ni a, prime minister Narendra Modi pawh he summit hmang tur hian a zin.

Ministry of External Affairs Secretary T S Tirumurti chuan he summit-ah hian, India chuan khawvel ram hrang hrangte thil tum pakhat neia kan thawh hona tur leh, firfiakte beihna kawnga thawhhona tur chungchangte chu Prime Minister kaltlang hian sawi chhuah a ni dawn a ti.

PM Modi hian he hunah hian Brazil, Russia, China leh South Africa ram hruaitute a hmuh zui nghal beisei a ni bawk. BRICS summit hi Brazil hian ṭum hnih a thlenna a ni a, kum 2010 khan a lo thleng tawh bawk a ni. Nakkum BRICS summit host tur ram pawh thlanfel ni tawhin, Russia chuan a thleng ang.

Kumina he summit thupui atan hian "Economic growth for an innovative future" tih hman a ni. He summit neih turah hian terrorist financing, countering radicalization, issue of foreign terrorist fighters, capacity-buil­ding leh use of the Internet for terrorist purpose-te sawiho a ni dawn. Use of the internet for terrorist purposes-ah hian India chu a chair bawk dawn. 

BRICS ramte hi Brazil, Russia, India, China leh South Africa-te an ni a, kum 2006 khan din a ni. South Africa tel hma 2009, June 16 khan BRIC summit hmasa ber chu Russia-a Yekaterinburg-ah neih a ni. China-in a sawm hnuah kum 2010 khan South Africa chu he pawlah hian a tel a, BRICS tia hmingthlak zui a ni.