Maharashtra-ah Sorkar siam thei awm lo President's Rule puang

Maharashtra-ah sorkar thar a la din mai theih loh vanga Governor Bhagat Singh Koshyari-a'n President's Rule puang mai tura a rawtna chu pawmin, nimin tlai khan president Ram Nath Kovind chuan Maharashtra chu President's Rule-a dah a nih thu a puang ta. 

Governor hian a report-ah, assembly inthlan result puan aṭanga ni  20 dawn hnuah pawh  eng political party mahin sorkar an siam theih tur a hnenah an la thlen loh vangin President's Rule puang mai tur hian a rawt a ni.  A rawtna siam hi union cabinet lam pawhin an lo pawmpui nghal bawk. 

Shiv Sena chu ṭangrual sorkar siam tura ni thum hun pekbelh tura an ngenna Governor-in a pawmsak duh loh vangin an lungawi lo hle a,  nimin khan Supreme Court-ah an zualko a, Governor chu BJP thu ang anga awmah an puh. 

Supreme Court-a petition an thehluhah, Shiv Sena chuan Governor hian sorkar siam tura BJP-te a sawm khan darkar 48 hun a pe a, mahse Shiv Sena erawh chu darkar 24 chauh hun a pe thung tih an sawi. 

Governor hian sorkar siam tura Shiv Sena ten hun pekbelh tura an ngenna chu hnawlin, a hun pek darkar 24 a liam hnuah Sharad Paward-a kaihhruai, National Congress Party chu Thawhṭanni khan a sawm ve leh a ni. NCP te hi nizan dar 8.30 thleng hun pek an ni bawk. Mahse NCP-te hian sorkar hi an siam thei dawn loa a lan hnuah hun pek hi nghak thleng loin, nimin tlai 5:30 khan President's Rule hi puan hnan a ni ta a ni. 

Kar kal ta Inrinni khan Maharashtra assembly term kal mek chu a tawp tawh a, Governor hian party pathumte chu sorkar siam turin a sawm tawh a ni. Party mala seat la hnem ber, BJP in sorkar a siam thei dawn lo tih a sawichian hnuah, Governor hian Shiv Sena hi a sawm leh a, a hun pek chhunga sorkar thar tur an siam theih loh avangin NCP hi a sawm leh a ni.