Public Service Broadcasting Day an lawm

All India Radio, New Delhi chuan nimin khan Public Service Broadcasting Day an lawm.

India hnampa, Mahatma Gandhi khan November 12, 1947 khan a vawi khatna atan All India Radio, New Delhi hi a tlawh a, heihi a tlawh awmchhun a ni bawk. Hemi hriatreng nan hian kum tinin November 12 hian Public Service Broadcasting Day hman a ni ṭhin. 

Mahatma Gandhi hian All India Radio, New Delhi a tlawh ṭum hian ram inṭhendarh hnua Kurukshetra, Haryana-a awm lailawkte pualin thu a sawi a ni. Nimin khan Public Service Broad­casting Day pual hian All India Radio, New Delhi chuan hun a buatsaih. Prasar Bharati Chairman Dr. A Surya Prakash chuan Mahatma Gandhi-a'n AIR Studio a tlawh ni a nih avangin ni chhinchhiah tlak a nih thu sawiin, AIR ngaithlatute chu duhsakna a hlan bawk.

Dr. A Surya Prakash chuan Guru Nanak Dev piancham kum 550-na a lo ni ve chiah tih sawiin, Prasar Bharati chu public service broadcasting-a mawh­phurhna pek an ni a, an kalpui chhun­zawm zel dawn tih a sawi a ni.