PM Modi-a'n Bastar-ah sipaite Diwali hmanpui

Prime minister Narendra Modi chuan, nimin Pathianni khan Chhattisgarh-a Bastar biala CRPF camp-ah sipaite diwali a hmanpui. PM Modi chuan rawlrala che ṭhin Left-wing nen an inbeihnaa security force-te inpekna leh hnathawh a fak. An inpekna chuan helai biala rawlrala chet ṭhinna a titawp tih a sawi bawk.

Maoist helpawlte nen inbeih chu thil awlsam a nih loh thu leh, state 20 dawna district 230 chuang chu helpawlte chetna avangin nasa takin a nghawng tih PM chuan a sawi. Ram tundinna leh hmasawnna turin hmelmate chu ruahmanna felfai tak nen beihlet a ṭul thu a sawi. Hei bakah kum 47 hnua a vawi khatna atan, nikum chhung khan CRPF sipai indonaa thi an awm lo tih a sawi. India ramri venhim hnathawktu sipaite leh, ramchhunga helna do kawnga hmalatu security force-te mawhphurhna sawilangin, ram leh hnam inlungrualna leh inpumkhatna venhim a pawimawh thu a sawi.

Chhung lama invenhimna tihchak a nih chuan, rampawn lam aṭanga hmelmaten an thil tum an ti hlawhtling thei lo tih a sawi. Prime Minister chuan Congress sorkar laiin helna chu tihtawp theih loha ngaih a nih thu a sawi. Kum 2004 leh 2013 inkarah kumtin hel laka sipai thi an tam ṭhin thu leh, khami hunlaia sorkar khan a ngaihven lo tih a sawi bawk a ni.