Odisha-ah bird flu a leng

Odisha sorkar chuan Siripur hmuna Odisha University of Agriculture and Technology (OUAT) -a ar vulhna farm-ah bird flu a leng tih  a puang. 

Nimin atang khan OUAT aṭanga km 1 biala awm ar te chu suatin, leihnuai thuk taka phum turin hriattirna state sorkar chuan a tichhuak a, he bial chung hi infected zone tiin a puang zui. Km 1 aṭanga km 10 bial chhung chu surveillance zone-a puan a ni bawk. Hma la turin Rapid Res­ponse Teams (RRT) 12 a din nghal a, heng mite hi veterinary doctor leh para-veterinarian aṭanga thlanchhuah an ni. OUAT aṭanga km 1 biala awm ar suat turin RRT zinga team 7 tirh nghal an ni a, a dang team 5 chu surveillance zone-ah tirh an ni bawk.  

Nimin vek khan Nan­dankanan Zoo pawh khar nghal a ni. Thuneitu lam chuan mipuite chiai lo tura an hriattir bakah, a ranglamin sorkar chuan hma a lak mek thu a tarlang.