India leh US-in BTA chungchang kimchang zawkin sawi ho leh

India leh US chuan sumdawnna lama thawh dunna tur, Bilateral Trade Agreement (BTA) siam tur chungchanga kimchang zawka inbiakna chu kar liamta khan New Delhi-ah an nei leh tih sorkar official chuan an tarlang. Ram pahnih inkara insumdawn tawnna tura thawh dunna tur inbiakna kal mek hi US midterm election neih zawh taka Democrats party lamin Congress chamber pahniha an thuneihna an chan tak avangin beiseina thar a awm leh nia sawi a ni.

BTA chungchanga kimchang zawka inbiakna nei tur hian US aiawh, mi pahnih awmna team chuan November 2-3 chhung khan India rawn tlawhin sumdawnna leh chhiah lak dan tur awlsam zawka chinfel a nih theihna turin chipchiar zawka sawi hona hun an hmang a ni. Commerce ministry official tarlan danin inbiakna hi a kaltluang a, inremna thawh khatna zo fel turin inbiakna pawh kalpui zui mek a nih thu an sawi.

Inbiaknaah hian chhiah chungchang leh India agri-dairy market chungchang chu inrem theih lohna lian ber a la ni a, hemi bakah India-in Russia oil a lei avanga US-in a chhiah chawi tihpun chungchang pawh inremna an la siam theih lohna chhan la ni bawk.

Ram pahnih aiawhte inbiakna kal lai hlawhtlin dan a zirin technical lama inbiakna chhunzawm leh tur a ni a, mahse, inbiakna hian thawh dunna an lo neihsa chu a nghawng buai tel dawn lo niin official lam chuan an tarlang. India expoerter lam pawhin inbiakna hian thil ṭha zawk a thlen an beisei a ni. Kumin February aṭang khan ram pahnihte hian BTA chungchangah indawrna an nei tawh a ni.