Kum 2022-ah tuihnuaia metro siam zawh hman tum

Kolkata Metro Rail Corporation (KMRC) chuan Hooghly lui hnuaia kaltlang tur metro rel kawng a sial mek a, kum 2022 March thlaa zawh tum a ni.

Metro tlanna (line) kawng hi Km 16.6 a thui a ni dawn a, Kolkata aṭang Howrah inkar niin station ruk a awm ang. He metro line thar tur hi nitinin mipui  9,00,000 velin an hman rin a ni a, India rama tunnel kaltlanga tuihnuaia inkalpawhna hmasa ber tur a ni bawk. 

Hooghly lui chungah hian Howrah Bridge a awm a, he lei zawh chhung hi minute 20 vel a ni. Metro line thar hian helaia veivak te hun a tihtawi sak dawn a ni. Hooghly lui hnuaia tunnel siam mek hi lei aṭanga teh chuan metre 30 vela thukah a awm.

He project hi East-West project zinga mi a ni a, kum 2014 khan zawh tum  a ni. Mahse metro line sakna bula khawsa ten an awmna hmun an chhuahsan lawk loh avangin hna a ṭhuanawp thu KMRC lam chuan an tarlang. Tunah hian KMRC lam hian Indian Railway Board aṭangin instalment hnuhnung ber tur an nghak mek a, last instalment-ah hian cheng vaibelchhe 2,000 ruahman a ni.

He metro line thar sakna hi Japan International Cooperation Agency (JICA) chuan 48.5% tumin, cheng vbc 4,160 chu KMRC an puk tir a, kum 30 chhung loan hi an rul ang. East-West metro project hi India Railway Ministry in 74% an hauh a, Ministry of Housing and Urban Affairs-in 26% an hauh thung.