Arvind Kejriwal leh a fanu thahah vau

Delhi chief minister hlui leh Aam Aadmi Party (AAP) hruaitu, Arvind Kejirwal chu Lawrence Bishno gang member nia insawi pakhat chuan Rs vbc 7 pe tura vauin, pawisa hi an pe lo a nih chuan a fanu, Harshita Kejriwal nen thahah a vau a ni.

Hemi chungchangah hian Tilak Nagar MLA Jarnail Singh chuan a vautu hnen aṭang hian phone call leh WhatsApp message a dawn thu police a hrilh a ni. Rs vbc 7 pe turin a phut a, pawisa hi an pe lo a nih chuan an pafaa a thah tur thu a sawi niin a tarlang.

Singh-a'n complaint a theh luh hnuah, Mohali police-te chuan Bharatiya Nyaya Sanhita (BNS) leh Information Technology Act hnuaiah thubuai an ziak lut nghal a ni. Hemi chungchang chhui tur hian Cyber Crime Police Station Inspector Sunik Kumar ruat a ni nghal bawk.

Police-te chuan call record, IP logs leh location data te an enfiah mek thu an sawi. Singh chuan Kejriwal leh a chhungte venhimna ṭha tak pe turin police-te hi a ngen nghal a ni.

Hetih lai hian Punjab Poilce-te chuan hun eng emaw chen aṭang khan gangster network lakah beihpui an thlak mek. Anti-Gangster Task Force (AGTF) nen thawk duna an state chhunga beihpui an thlaknaah, police-te chuan hmun 406 dap tawhin mi 87 an man tawh.