Delhi-a tractor rally neih tum chungchangah SC-in Delhi police-te thutlukna siam turin ti

Farm law duh lohna lantira nawrh huaihawt mek, loneituten Republic Day-ah Delhi khawpui chhunga tractor rally huaihawt an tum chungchangah Supreme Court chuan loneitute khawpui chhunga luh phal leh phal loh chungchang chu Delhi police-te thutlukna siam tur a ni, a ti. 

Republic Day nia loneituten tractor rally huaihawt an tum chu khap turin sorkar laipui chuan Supreme Court-ah hian a ngen a, nimin khan court chuan ngaihtuahin 'law and order' kaihhnawih thil a nih avangin Delhi Police-te thutlukna siam tur a ni, tiin a tarlang. 

Chief justice of India (CJ) Sharad Arvind Bobde kaihhruai judge pathum awmna bench chuan, Delhi police-te chu dan kenkawh tura thuneitu an ni a, "Tunge khawpui chhunga luh phalsak an nih a, eng zat chin nge lut thei ang tihte chu law and order kaihhnawih, police-te thutlukna siam tur a ni," an ti. Hetih lai hian sorkar aiawha ding, attorney general KK Vengupal erawh chuan he thil hi chu thil buaithlak bik tak a nih avangin court chuan thupek siam ngei se a phut tih a sawi ve thung. Court chuan January 20-a ngaihtuah leh turin a dah ta a ni. 

Hetih lai hian loneitu pawl hruaitu ṭhenkhatin nimina chanchinbu mite an kawmnaah, tractor rally neih tur hian Republic Day parade a tihbuai dawn loh thu an sawi thung. Rally hi Republic Day lawmna tibuai loin, khawpui hualtu kawngpui, Outer Ring Road-a km 50-a thuiah neih an tum tih an sawi a, Delhi leh Haryana police-te pawhin an remtih sak an beisei thu an sawi.