Thla 8 chhunga hripui vanga thi tlem ber ni thleng
India ramah Pathianni khan Covid-19 vanga thi mi 145 an awm a, thla riat chhunga ram puma coronavirus vanga thi an tlem ber ni a ni.
Hemi ni vek hian hripui kai thar mi 13,788 awm belh lehin, tun thla chhunga ni khata hri kai thar 14,000 aia tlem an awm ṭum hnihna a ni bawk. Ni 11 chhung chu a zawnin hri kai hmuh thar hi 20,000 aia tlem zel a ni tawh.
Hri kai hmuh chhuah thar an tlahniam zel a, hetih lai hian enkawl dam erawh an pung zel thung. Nimin thleng khan hri kai enkawl dam, recovery rate hi 96.59% a ni tawh a, khawvelah pawh rate ṭha ber ram a ni pha a ni. Hri kai mek hi 2,08,012 la awmin, hei hi hri kai hmuh chhuah tawh aṭanga 1.97% chauh a ni tawh a ni.
CSIR zirchianna tichhuak
Council of Scientific and Industrial Research-in pan-India serosurvey a neih aṭangin coronavirus hri leng mek chu mei zu mi (smoker) leh sa ei lo (vegetarian)-ah kai theihna a hniam (lesser risk) niin an sawi. Hei hi seropositivity hniam vang niin an sawi.
Survey hi ram chhunga CSIR institute 40 dawnah neih a ni. Zirchianna an neihah hian blood group 'O' chuan hri an kai har deuh nia sawi a ni bawk a, hetih lai hian 'B' leh 'AB' blood group erawh chu higher risk-ah an tel thung.
Nikum July thla khan union health ministry chuan mei zu mite tan Covid-19 hri chu a hlauhawm zual bik niin a lo sawi tawh a ni. Mahse CSIR-in a zirchianna a tihchhuahah mei zu mi ah hri hi kai theihna a hniam zawk nia a lan thu leh, Covid-19 chu respiratory disease ni mah se, mei zuk chuan a veng thei nia a lan thu an tarlang thung a ni.