Modi-a'n Ahmedabad leh Surat Metro Rail Project a hawng

Prime minister Narendra Modi chuan nimin khan video conferencing hmangin  Ahmedabad Metro Rail Project Phase-II leh Surat Metro Rail Project a hawng. 

PM chuan rail project-te chuan ram chhunga business centre lian pahnihte inthlunzawmna a tichak zual dawn a ni tiin, centre-a BJP kaihhruai sorkar chuan ram chhunga metro rail network chu nasa takin a tilian tawh a, kum ruk liam ta chhung khan km 450 chuanga metro network chu hman theiha siam zawh a ni, a ti. 

Modi chuan, "Kum 2014 hmalam kha chuan ram chhunga metro line chu km 225 chin chauh a la ni. Mahse kum ruk hnuah km 450 chuanga thui siam belha hman theih a ni tawh a ni," tiin tunah hian khawpui hrang hrang 27-ah metro network km 1,000 chuang siam hna thawh mek a ni tih a sawi. 

Ahmedabad Metro Rail Project Phase-II hi km 28.25-a thui niin niin, corridor pahnih a nia, corridor 1 hi km 22.8 niin Motera Stadium leh Mahatma Mandir inkar a ni a, corridor-2 hi km 5.4-a thui, GNLU leh GIFT-city inkar a ni thung. He project hi cheng vaibelchhe 5,384 senga siam a ni. 

Surat Metro Rail Project hi km 40.35-a thui a ni a, cheng vaibelchhe 12,020 senga siam a ni. Corridor pahnih awmin, corridor-1 hi km 21.61, Sarthana leh Dream City inkar a ni a, corridor-2 hi km 18.74-0 thui, Bhesan leh Saroli inkar a ni thung.