CAA duh lohna resolution Bengal-in pass ve leh

West Bengal parliamentary affairs minister Partha Chatter­jee chuan Thawhṭanni khan Assem­bly-ah Citizenship (Amendment) Act (CAA) duh lohna resolution chu pharhin Congress leh Left party member-te chuan an thlawp a. BJP MLA-te erawh chuan an dodal thung.

Bengal hi CAA duh lohna reso­lution pawmtu state palina a ni chiah a, Kerala, Punjab leh Rajas­than-te chuan pawm tawhin West Bengal hian a pawm ve leh ta a ni. Resolution an siamah hian Bengal chuan sorkar laipui chu a rang thei ang bera CAA hnuhkir tura hma la turin an nawr a, CAA dan chu ram 'pluralistic structure' kalh a ni tih sawiin, sakhuana behchhana mipui ṭhendarh tumna a ni, an ti.

Thawhṭanni-a CAA duh lohna resolution an pawmna, Assembly one-day special session-ah hian chief minister Mamata Banerjee chuan thu sawiin CAA chu ram danpui leh mihring mihrinna kalh a ni. He dan hi hnuhkir kan phut a, NPR pawh hnuhkir kan phut bawk, a ti a ni. 

West Bengal sorkar hian National Population Register (NPR) kalpuina tur hna zawng zawng pawh a titawp lailawk vek tawh bawk. Banerjee chuan NPR, NRC leh CAA-te chu thil inzawm vek, mipui duh loh a nih thu a sawi. Eptu pawl CPI(M) leh Congress-te chu politics thila an inlungrual lohnate dahṭhaa sorkar laipuia BJP dodalna kawnga thawhpuiah a sawm bawk.