Philipinnes tlawha zin PM Modi a rawn haw

Prime minister Narendra Modi chu Philippines-a ni hnih chama 23rd ASEAN-India Summit, 21st East Asia Summit leh Quad Leaders' Meeting-a tel hnuah India ramah a rawn let. Prime Minister hian Manila-a Gurudwara Khalsa Diwan pawh tlawhin, a siamṭhatna tur lungphum phumnaah a tel a ni.

Modi hian a cham chhungin Phillipine president Ferdinand R. Marcos Jr. hmuin venhimna, sumdawnna leh investment-a thawh dunna tihchakna tur an sawi dun. ASEAN-India Summit-ah Prime Minister chuan rawtna pakua a thlen a; chung zingah chuan hun rei tak chhung tuipui lama thawh hona tur ruahmanna siam, bloc member ram aṭanga khualzinte e-visa a thlawna pek, mining leh mineral-a thawh hona, civil nuclear energy sector-a technical exchange siamna tur ruangam dinte pawh a tel.

Quad Summit-ah PM Modi chuan Quad chu Indo-Pacific puma maritime security, supply chain, technology thar leh khuarel chhiatna thlenga inpuihtawnna tur thawh hona leh inrintawnna a nih thu a sawi. 21st East Asia Summit (EAS) ah Modi hian EAS ramten tuipui lam himna tura joint training leh khuarel chhiatna thlenga inpuihtawnna tur hmalakna kalpui a nih thu a sawi bawk. ASEAN-ah hian Southeast Asia-a ram 11- Indonesia, Malaysia, Philippines, Singapore, Thailand, Brunei, Vietnam, Laos, Myanmar, Cambodia leh Timor-Leste-te an awm a ni.