PM Modi hoin Council of Minister-in review meeting nei

Prime minister Narendra Modi kaihhruaiin nimin khan council of miniter chuan Bharat Mandapam, New Delhi-ah meeting an nei a, sorkarin ṭha awmna tura hnathawh leh hmalakna hrang hrangte an thlir let.

Prime Minister chuan pawisa khawl leh sum leh pai enkawl kawnga insumtheihna ngaih pawimawh thar a ṭul thu tarlangin, India ram nunphung chu pawisa khawl lamah a innghat a nih thu a sawi a, "khao, peeyo, mauj karo" ( ei, in, hlim taka chen) ang chi kha a ni ve lo, tiin minister-te a hrilh. Sum leh pai lama insumtheihna leh inthununna ṭha tak an vawn zui zel loh chuan, ram chhunga mi retheite khai chhuahna tura an hmalaknaa hmasawnna thleng mek chu a hlawhchham leh thei a ni, a ti. Retheihna aṭanga khai chhuah tawhte chuan an dinhmun ngaia an tlakhniam leh lohna turin pawisa khawl lam an ngaih pawimawh a ngai hle tih a sawi.

Meeting hi darkar thum leh a chanvel vel an nei a, ministry leh department hrang hrangte hnathawh an thlir let a ni. Modi chuan kum 2014-a Parliament Central Hall-a a thusawi hmasak ber sawi chhuakin, hemi ṭum hian a kaihhruai sorkar chu mi rethei zawkte tan a inpe dawn tih a sawi a, hemi kawnga an hmalakna chuan tun thlengin hmasawnna a thlen a ni, a ti.

Meeting-ah hian ram chhung venhimna bakah, ruihhlo hmansualna hluar chungchang pawh pawh an sawi ho bawk. Prime Minister chuan ruihhlo hman sualna lak aṭanga ṭhalai venhimna an ṭul thu sawiin, sorkarin Naxal hel tihbo tuma a beih ang chiahin ruihhlo leh a hmansualna thleng mek chu nuaibo turin a bulṭhut aṭangin a bei a, an la hlawhtling ngei ang tiin a sawi. India hmathlir leh ram enkawltu la ni tur, naupangte chu ruihhlo hmansualna laka an fihlim vek a duh thu a tarlang.