Punjab sorkarin smartphone sem chhuak dawn

Punjab Chief Minister Amarinder Singh kaihhruai Congress sorkar chuan inthlan dawna a lo tiam tawh angin an state chhunga ṭhalaite hnenah smartphone a semchhuak thuai dawn. 

Kum hnih liamtaa assembly inthlan neih dawna smart phone sem a lo tiam tawh tihpuitlinna turin Punjab sorkar hian Financial year 2017-2018 budget-ah scheme thar, 'Mobile Phone to the Youth' tih chu a lo telh tawh a ni. Smart phone hi ṭhalai nuai 50 vel hnenah sem tum a ni. 

A thawh khatna chu kumin March thla hian sem a ni dawn a, a dawngtu turte hian smartphone an la nei lo tih lanna, self-certification an thehluh a ngai thung ang. Sorkar thupuangtu chuan smartphone sem tur hi touch screen, camera leh social media khawih theihna tur applications awm a ni tih sawiin, 12GB data leh 600 local minutes talk time, one-year validity thunsak nghal an ni dawn tih a sawi.