
Nepal PM Balendra Shah a rawn zin dawn
Nepal prime minister Balendra Shah chuan November 22-23 hian prime minister Narendra Modi sawmna angin India a rawn tlawh dawn tih Nepal foreign secretary Amrit Bahadur Rai chuan nimin Zirtawpni khan a puang. Hei hi Shah-a'n kumin March thlaa prime Minister nihna a chelh aṭanga India a tlawhna hmasa ber tur a ni.
Bhutan PM Shah leh PM Modi te hian Thawhṭanniah inbiakna an nei nghal dawn a, India-Nepal thawh dunna leh, regional leh international-a harsatna awmte an sawi dun dawn a ni. Shah chuan president Droupadi Murmu pawh a hmu bawk ang.
Prime Minister pahnihte chuan energy kaihhnawih project hrang hrang an hawng dawn a, inbiakna an neih zawhah press conference buatsaih a ni ang. Ram pahnihte hian hun rei tak aṭangin inzawmna ṭha tak an nei tawh a ni. PM pahnihin inbiakna neih turah sumdawnna, transit, energy, investment, inkalpawhna leh infrastructure hmasawnna an sawi dun rin a ni a, hei bakah economy lama thawh dunna leh, sector pawimawha thawh hona chungchang an sawi rin a ni bawk.
Shah cham chhung hian zirna, health, loneih, space, khuarel chhiatna hmachhawn dan leh, human resource tihhmasawnna turin inremna, Memorandum of Understanding (MoU) ziah a ni bawk ang. Shah hian sumdawnna lam aiawhtute nen meeting a kaihruai dawn bawk a, prime minister chief advisor Kumar Byanjankar leh sorkar hotu lian ten an tel dawn a ni.