Hmarchhak mite dikna leh chanvo humhalh zel a ni dawn - Modi

Prime Minister Narendra Modi chuan Citizenship Bill pass a nih avangin hmarchhak mite dikna leh chanvo chu rahbeh a ni dawn lo tih sawiin, humhalh sak zel an ni ang, a ti. Modi hian nimina Maharashtra-a vantlang inkhawm buatsaihah he thu hi a sawi a ni. 

Prime Minister chuan, "Assam leh hmarchhak state hrang hranga ka unau duhtakte u, hei hi ka tiam duh che u a ni. In dikna leh chanvo hi rahbe sak in ni loang," tiin, mipui pungkhawm hmaah a sawi. Narendra Modi chuan Citizenship Bill hian Assam leh hmarchhak state-te tan harsatna a thlen dawn lo nia sawiin, an dikna leh chanvote pawh humhalh sak zel an nih tur thu a sawi bawk. Sorkar laipui chuan hmarchhak mite hmasawnna chu a dah pawimawh reng thu sawiin, an hmasawnna leh hamṭhatna turin a thawk zel dawn niin a sawi bawk. 

Modi thusawi hian ram pum a deng chhuak nghal a, Lok Sabha-in Citizenship (Amendment) Bill, 2016 a pass duh lotute beng a verh zual a ni. Lok Sabha chuan Thawhlehni khan Citizenship (Amendment) Bill, 2016 hi a pass a, hei hian sawiselna leh dodalna a tawk nasa hle. He Bill hi Bangladesh, Pakistan leh Afghanistan aṭanga Muslim sakhaw zuitu ni lo, India rama kum ruk chhung khawsa tawhte hnena khua lehtui nihna pek theihna a nih avangin, heng ram ṭhenawma awma awm hmarchhak state-te chuan nasa takin an dodal a ni. 

Assam chu Citizenship Bill duh lohna lantir nasa ber niin, BJP thawhpui Asom Gana Parishad (AGP) chuan an thawhdunna hi an titawp a ni. AGP chuan BJP kaihhruai NDA sorkar hmalak dan chu hriatthiam har an tih thu sawiin, hmarchhak mite rahbe tumnaah an ngaih thu an sawi. 

Meghalaya Chief Minister Conrad Sangma chuan hemi chungchangah hian party meeting a ko a, an thawhpui BJP chu an thlawp zui zel dawn em tih an ngaihtuah tur thu a sawi.