Ayodhya case : January 29-a ngaihtuah turin sawn hla leh

Ayodhya ram inchuh chungchanga thubuai chu January 29-a ngaihtuah turin sawn hlat leh a ni. 

Supreme Court chuan nimin khan Ayodhya case hi a ngaihtuah a, mahse he thubuai ngaihtuahtu constitution bench-a judge panga zinga pakhat chu a ban avangin thubuai ngaihtuah hun a sawn hla leh a ni. Justice UU Lalit chuan he thubuai kaihhnawih thil dangah lawyer a nih tih sawiin bench member anihna aṭangin a bang a ni. Constitution bench-a judge dangte chu Justice SA Bobde, Justice NV Ramana leh Justice DY Chandrachud-te an ni. 

Kum 1992-a Hindu right wing-ten Uttar Pradesh-a Ayodhya-a kum zabi 16 hunlaia sak, Babri mosque an tihchhiat hnuah he hmun hi an inchuh zui a, Hindu-te hian Ram temple sak an tum a ni. Central leh UP-a rorellai, BJP leh an thurualpuite bakah right wing group hrang hrangte chuan Lok Sabha inthlanpui neih hun tur puan a nih hma ngeia Ram temple sak hna ṭan a nih theih nan sorkar an nawr a, temple sakna tur hian dan siam mai turin an nawr a ni. Supreme Court pawh he thubuai chungchang hi ngaihtuah thuai turin an ngen bawk. 

Prime Minister Narendra Modi chuan Ram temple sak tur chungchangah court in a ngaihtuah phawt loh chuan thupek siam theih a ni lo tih a sawi a, court in a ngaihtuah hnuah sorkarin a mawhphurhna anga hma la turin an inpeih tih a sawi. BJP manifesto-ah pawh Ayodhya buaina chungchang chinfel dan ngaihtuah pawh an lo tiam tawh tih a sawi. 

Ayodhya-a buaina hi kum 1992, December 6-a tihchhiat Babri Masjid awmna ram acre 2.7 chuanga zau a ni. Kum 2010 khan Allahabad High Court chuan an ram inchuh hi hmun thuma ṭhena hmun hnih chu Hindu-te tan pein, hmun khat chu Sunni Waqf Board tan a pe a ni. Mahse court rorel danah hian lungawi loin, Hindu leh Muslim organisation-te chuan Supreme Court-ah an appeal a, Supreme Court chuan High Court thupek hi kum 2011 khan a dansak a ni.