Lalu-a bail dilna hnawlsak

Jharkhand High Court chuan Bihar Chief Minister hlui leh Rashtriya Janata Dal (RJD) president Lalu Prasad Yadav-an ranchaw man tihchingpen thubuai a neih mek pathuma bail a dilna chu a hnawlsak.

Justice Aparesh Kumar Singh chuan Yadav-a bail dilna hi a hnawlsak tih CBI lawyer Rajeev Sinha chuan a sawi. 

Lalu-a hi Bihar chief minister a nih laia central aṭanga ran chaw man tur sum tam tham tak dawn tihchingpen thubuaiah hian thiam loh chantir a ni a, kum 2017 December thla khan Ranchi jail-ah tantir a ni. Kum khat chuang zet jail-a tantir a nih hnuah, a hriselna ṭhat tawk loh leh enkawl a ngaih avangin Ranchi-a Rajendra Institute of Medical Sciences (RIMS)-ah dah mek a ni. 

RJD MLA leh party thupuangtu Sahkti Yadav chuan an party member leh Bihar mipuite chu court thutlukna siam chuan a ti na hle tih sawiin, Supreme Court-ah thlen leh an tum tih a sawi.