NCW in Rahul Gandhi hriattirna pe

National Commission for Women (NCW) chuan nimin khan Congress president Rahul Gandhi hnenah Defence Minister Nirmala Sitharaman-i chungchang mawilo leh ngeiawm taka a sawi avangin  hriattirna a pe a, insawifiah turin a ti. 

Rahul Gandhi hian Nilaini-a Jaipur-a farmer rally neihnaa thu a sawiah, "Vengtu pakhat, a awm inches 56 zeta lian chu tlanchhiain, hmeichhe pakhat hnenah Sitharaman ji, min venghim roh, keimah ka invenghim zo dawn lo a, min venghim rawh a ti a", tiin a sawi a ni. Hei hi kar kalta Lok Sabha-a Rafale deal chungchang PM aia Defence Minister Nirmala Sitharaman-in a sawifiah chungchang a sawilanna a ni. 

Eptu party-ten Rafale fighter jet deal chungchanga thil dik tawk lo awm nia an sawite sawifiah tura na taka an phut hnuah pawh PM hian Parliament-ah engmah a la sawichhuak lo a, Finance Minister Arun Jaitley leh Defence Minister Sitharaman-i te chauhin hemi chungchang hi House-ah an la sawifiah a ni. Congress party president hian Rafale deal chungchanga an zawhnate chu chhang turin PM hi a phut zui reng a ni. 

NCW chuan hriattirna a pekah, report an dawn danin Rahul Gandhi hian PM chu tlanchhiain, hmeichhe pakhat, Defence Minister Nirmala Sitharaman-i a sawina hnenah venghim turin a dil tiin a sawi a ni,  a ti. Commission chuan Gandhi thusawi duh dan hi hmeichhe hmusitna, ngeiawm leh zahawm lo tak a ni tih sawiin, hmeichhe zah lohna lantirna a ni, a ti.