PM Modi kaihhruai committee-in CBI Director a ban

Supreme Court-in Central Bureau of Investigation (CBI) Director Alok Verma chu sorkarin chawlh a lak luihtir hnuah, a hna ngai chelh turin dah a ni leh a, chumi hnu lawkah Ningani khan Prime Minister Narendra Modi  kaihhruai high-power panel chuan Verma hi a hna aṭang hian a ban leh nghal. 

Alok Verma hi kumin January 31 thleng CBI Director hna chelh tura dah a ni a, mahse a term tawp hmain ban a ni a, kum 55 chhung CBI hotu nihna aṭanga ban hmasak ber a ni. 

CBI Director aṭang ban a nih hnuah, Verma hi Union Home Ministry hnuaia Fire Service, Civil Defence and Home Guards Director General atan dah a ni. 

Sorkar chuan Ningani vek khan CBI hotu lu ber atan hian Additional Director M Nageshwar Rao dahna tur thupek a tichhuak nghal a, nimin khan Rao hian a hna thar hi a zawm nghal.

High-power panel-ah hian Prime Minister bakah Lok Sabha-a Congress leader Mallikarjun Kharge leh Jutice AK Sikri, Chief Justice of India Ranjan Gogai-an a nominee-te an awm a ni. Ningani tlai khan meeting neiin, 1979 batch IPS officer Verma chungchang hi an ngaihtuah a ni. Panel member pathum zingah Kharge hian Verma banna tur hi thlawp lo mah se, member dang pahnihin an thlawp avangin a hneh zo ta lo tih a sawi. 

Panel-ah hian Central Vigilance Commission (CVC) in Verma a puhna hrang hrang pariat pharh a ni a, heng zingah hian CBI-a officer hminghliauna nei dah luh tuma puhnate, meat exporter Moin Qureshi thubuai chhuinaa inrawlha puhnate leh IRCTC scam chungchangte a tel. 

CVC chuan Moin Qureshi thubuai-ah Verma hi a inrawlh ngei a ni tih finfiahna an nei niin a sawi a, hei bakah hian pawn lam agency RAW a inrawlh thu leh, cheng vaibelchhe hnih inpek a nih dante an sawilang bawk. CVC chuan Verma thiltih danah hian thil rinhlelhawm tak a awm ngei nia sawiin, a lakah criminal investigation neih an duh thu pawh a sawi bawk. 

IRCTC case-ah pawh Verma hian FIR a hming pakhat tarlan chu thai bo a tum niin CVC chuan a sawi a, record siam danglamte pawh an hmu niin a sawi. Hei bakah hian officer hminghliauna neite Verma-an CBI-a dah luh a tum tih a sawi bawk a ni. 

Panel meeting hi Ningani tlai khan darkar hnih dawn neih a ni a, member zinga mi Kharge chuan Verma hi a hna aṭang ban ngawt loin CVC in a puhna hrang hrang chungchang chu committee hmaa insawifiahna hun pek a phut a, mahse PM leh Justice Sikri-te chuan an pawmpui loh avangin member tam zawk duhdan angin committee thu hi kaltlangpui a ni ta a ni. Kharge chuan Verma puhna hrang hrangte chu finfiahna ṭha tawk a hmu lo niin a sawi. 

CBI Director a nihna aṭang ban a nih chungchungah Alok Verma chuan amah hawtu, tihchhiat duhtu pakhat avanga he thil hi thleng niin a sawi. Mi pakhat, amah tihnat duhtuin thu dik tawk lo hmanga a puhna hmangin a hna aṭang chuan transfer a nih phah ta a ni, a ti. 

Verma chuan CBI chu investigating agency pawimawh leh mi lian leh dinhmun sang zawkte eiruk chungchang chhuitu a nih avangin a hnathawhna kawngah pawn lam mi inrawlh loa vawnhim a ni tur a ni, a ti. "Pawn lam mite inrawlh loin hna a thawk tur a ni. He institution zahawmna humhim tumin ka theihtawp ka chhuah a, hetilai hian tichhiat tum an awm reng a ni. Hei hi nikum October 23-a sorkar laipui leh CVC thupek tihchhuah aṭangin a hmuh theih vek a ni", a ti.