Modi-an Rajnikanth leh AIADMK thawhpui tura an inhawn thu a sawi

Prime Minister Narendra Modi chuan Lok Sabha inthlanpui neih turah  party dang thawhpui tura BJP a inhawn reng thu a sawi. Tamil Nadu party AIADMK, DMK leh Rajnikanth-te thawhpui tur chuan an inhawng reng niin a sawi. 

Kum 2014 Lok Sabha inthlanpuiah khan BJP hian Tamil Nadu-ah party panga a thawhpui a, heng zingah hian DMDK, PM Leh Vaiko kaihhruai MDMK-te an tel a, mahse seat 39 awmah seat hnih chiah an la a, BJP leh PMK in seat khat ve ve an la a ni. Mahse heng party pangate hian BJP an thawhpuina hi an titawp vek tawh a ni. 

PM chuan NDA chak tak awm chu mi tin tana rinna nghah ngamna a ni tih sawiin, BJP chuan party malin majority nei pha mah se an thawhpui party dangte nena sorkar siam an thlang zawk tih a sawi. An lo inṭhianṭhat tawhnate chu an ngaihlu reng a, hei vang hian party dang tan an inhawng reng niin a sawi a ni. 

Hemi rual hian Congress party chu bei nghalin,  regional party-te ngaipawimawh loah a puh a, anmahni mal chauha thuneihna nei theia inngaiin regional party leh mipuite duhdante an ngai pawimawh lo a ni, a ti.