Cabinet-in AIIMS pathum dinna tur pawm

Union cabinet chuan Ningani khan Jammu and Kashmir leh Gujarat-a All India Institute of Medical Sciences (AIIMS) pathum din rawtna a pawm. J&K-ah pahnih dinin, Gujarat-ah pakhat din a ni ang. 

Samba, Jammu-ah Vijaynagar-ah AIIMS hi cheng vaibelchhe 1,661 sengin din a ni dawn a, Kashmir-a Pulwama-a Awantipora-ah cheng vaiblechhe 1,828 senga din a ni dawn a, Gujarat-a Rajkot-ah cheng vaibelchhe 1,195 sengin din a ni dawn bawk tih official thuchhuah chuan a tarlang. 

Union Health Minister JP Nadda chuan AIIMS thar dinna tur cabinet-in a pawm chu lawmawm a nih thu sawiin, he hi prime minister hmathlir tihhlawhtlinna tur a ni, a ti. AIIMS thar sakna tur senso hi sorkar laipuiin a tum vek dawn a, a enkawl zuina pawh a tum dawn bawk niin minister chuan a sawi. 

AIIMS pathum din thar turah hian UG (MBBS) seat 100 leh BSc (Nursing) seat 60 ṭheuh a awm dawn a, super specialty department 15-20 a awm dawn bawk a ni. AIIMS tharah hian khum 750 ṭheuh dah niin, ni khatah OPP patient 1500 vel leh thla khata IPD patient 1000 vel enkawl thei tura beisei an ni tih minister chuan a sawi.