RTI Act-in CJI Office huam tel tawh dawn
Supreme Court chuan democracry ramah judge-te chu dan chungah an awm thei lo tih sawiin, chief justice of India office pawh Right to Information (RTI) Act in a huam tel vek tur thu a sawi. Chief Justice of India Ranjan Gogoi kaihhruai, judge panga awmna chuan order hi a tichhuak a ni.
Kum 2007 November thla khan RTI activist Subhash Chandra Agarwal chuan Supreme Court-ah RTI hmanga judge-te thil neih chungchang information dilna a thehlut a, mahse information hi pekchhuah a ni lo. Hemi hnu hian Agarwal chuan Central Information Commission (CIC) ah zualko lehin, anni hian Spureme Court hnenah Chief Justice of India office chu RTI Act huamchhunga awm a ni tiin, information hi pechhuak turin a ti.
Kum 2009 January thla khan Supreme Court chuan CIC thupek hi Delhi High Court-a ngaihtuah turin a sawn a, Chief Justice of India office chuan RTI Act hnuaiah judge-te thil neih zat chu a puangzar thei lo tiin, langtlang lutuka thil kalpui tum chuan judiciary-in mahnia thuneihna a neih dan thlengin a nghawng thei dawn niin a sawi.
High Court-a single-judge bench chuan kum 2009, September 2 khan CIC thupek hi thlawpin, CJI office chu RTI Act hnuaiah awm a ni a, he dan hnuaiah hian judge-te thil neih zat pawh mipui hriata puan a ni tur a ni, a ti. Hemi hnua court meeting neihah, Supreme Court chuan judge-te hi neih chu a ṭul dan azirin, official website-ah tarlan a ni chauh tur a ni, tiin resolution a pass hnan leh.
Supreme Court hian single-judge thutlukna hi divisoin bench-ah khing lehin, high court chuan hemi chungchang ngaihtuah turin special three-judge bench a siam zui leh bawk. Kum 2010 January thla khan three-judge bench chuan CJI chu RTI Act in a huam thu a sawi ve leh. Mahse hei pawh hi Supreme Court chuan appeal lehin, kum 2010 aṭang khan tihkhawtlai a nih hnuah five-jduge Constitution bench ngaithuah turin dah a ni ta a ni. Nimin khan CJI kaihhruai Constitution bench chuan Chief Justice of India office chu public authority niin, RTI Act, 2005 in a huam tel thu a sawi ta a ni.