J&K : Article 370 tihtawp hnu Ni 100-naah boruak la ṭang
Jammu & Kashmir hnena special status pekna, Article 370 tihtawp a nih aṭangin nimin kha a ni 100-na a ni. Nimin pawh khan internet service tihtawp a la ni a, khuahkhirhna hrang hrang pawh kalpui a la ni bawk.
Political hruaitu ṭhenkhatte chhuah zalen ni tawh mah se hruaitu lawk berte pahnih, J&K chief minister hlui Omar Abdullah leh Mehbooba Mufti-te chu an inchhuahsan thei loa hren zui an la nih bakah, Jamia Masji (mosque)-a ṭawngtai tura chhuah khap a la ni bawk. Anni bakah hian minister hlui leh legislator hluite pawh hren chhunzawm an la ni.
Srinagar-a Hazrat Naqashband Sahib mosque pawh tlai lama ṭawngṭai tura mipuite kal phal loh a ni. Heng bakah hian 'Idd-e-Milad un Nabi' hmang tura Hazratbal shrine tlawhpawh pawh phal a ni lo. Dawrkaite pawh zinglam dar 10.30 thleng bak dawr hawn an phalsak lo a, dawr ṭhenkhatte chu tlai 4.30 hnulamah an hawng leh ṭhin a ni. Nitina mipuiin an lei ṭhin leh an dawr ber ṭhin thawmhnaw dawr, inneih thuam thil dawr, electronic, mobiles leh eichawp zawrhna dawrte chuan harsatna an tawk nasa zual a, an sumdawnna a khaihlak nasa hle.
Kashmir-ah rel tlantir ṭan
August 5-a Article 370 paih a nih aṭang khan Kashmir valley-ah chuan rel tlan tihtawp a ni a, hun rei tak chawlhtir an nih hnuah Thawhlehni aṭang khan rel service hi chhunzawm leh ṭan a ni.
Police-ten venhimna chungchang an siam thehluh a nih hnuah Thawhlehni khan Baramulla–Srinagar rel service chu chhunzawm leh a ni. Northern Railways thupuangtu Deepak Kumar chuan Baramulla-Srinagar rel service hi trip hnih chiah an service tir tih a sawi a, heihi venthawn thil thuah thuneituten zing dar 10 aṭanga tlai dar 3 inkar chhungah chiah service rih tura an hriattir vang tih a sawi.
Thawhlehni hian harsatna engmah an tawk lo tih sawiin, state sorkarin clearance a tihfel hnuah chuan trip tam zawk an tlantir thei dawn tih a sawi bawk.