PM-in Russia, Brazil leh China President-te inbiakna neihpui
Brazil, Russia, India, China and South Africa (BRICS) summit, Brazil-a neih karlakah Nilaini zan khan prime minister Narendra Modi chuan Russia, Brazil leh China President-te inbiakna a neihpui.
Russia president Vladimir Putin leh PM Narendra Modi hi kumin chhunga an ṭumli inhmuhna a ni a, ram pahnihin an inlaichinnaa hmasawnna an neih dante an sawidun a ni. India leh Russia ram hruaitu lu pahnih hian insumdawntawnna 2025 thlenga $tld 25 hu neih an remtih chu an tihhlawhtling der tawh tih an sawi.
Brazil president Jair Bolsonaro nena inbiakna an neihah hian ram pahnih mipuiten hamṭhatna an neih theihna tura thawhdunna chungchang an sawi. Brazil tan India ramah investment tih theihna kawng zau tak a inhawn thu sawiin agricultural equipment, animal husbandry, post-harvest technology leh biofuel lamahte investment a tih theih tih a sawi.
Modi chuan Brazil President-in India khua leh tuite tana a thlawna visa pek theihna a siam chu a lawm thu a sawi bawk. Prime Minister hian Jair Bolsonaro hi nakkum Republic Day-a khuallian ni turin a sawm bawk a, Jair pawh hian lawm takin a pawm a ni.
Russia leh Brazil ram hruaitute inbiakna a neihpui hnu hian Modi hian Chinese president Xi Jinping pawh inbiakna a neihpui. Ministry of External Affairs thupuangtu Raveesh Kumar chuan Modi leh Xi Jinping hian India leh China-in kawng hrang hranga thawhdunna an neihte an sawidun tih twitter-ah a sawi.
President Jinping hian Modi hi nakkuma informal summit vawi thumna China-a neihpuiah a sawm a, a hun leh hmun erawh la sawi ṭhat turin an ti thung. Ram pahnih hruaitute hian a rang thei ang bera sumdawnna leh economy kaihhnawihah High-Level Mechanism thar siam an remti bawk a ni.