RSS flag dah sawn vangin thubuai ziak lut

Uttar Pradesh, Mirzapur district-a Banaras Hindu University deputy chief proctor, Kiran Damle chu university campus-a Rashtriya Swayamsevak Sangh (RSS) flag a dah sawn avangin a lakah thubuai theh lut a ni. Thawhlehni khan RSS leh ABVP member-ten campus chhunga yoga 'shakhas' an practic laiin Damle hian  RSS flag tar  a la sawn  niin an sawi.

Thubuai hi Dehat Kotwali police station-a thehluh a ni a, RSS office-bearer Chandra Mohan leh a hote chuan flag laksawn chungchang hi an chhui chian hnu ah, Damle lakah hian thubuai chu an ziak lut ta a ni. Damle chu an flag zah loah puhin, RSS member-te chuan administrative building-ah lungawi lohna an lantir zui bawk. 

Damle hian a thil tih avang hian hian ngaihdam a dil bakah a hna aṭang a banna thu proctor O.P Singh hnenah a thawn. "He campus-ah hian kum 10 chhung ka thawk tawh a, helai vel thlithlai hi ka hna a ni. Vawiin thlengin kan campus-ah hian 'shakhas' an hman ka la hmu ngai lo. Chuvang chuan kan campus chhunga heng thil hi ti lo turin ka hraittir a ni", a ti.  

Hetih lai hian MLA hlui leh congress hruaitu Lalitesh Pati Tripathi chuan RSS office-bearer-te hi engvangin nge campus chhungah hian an lo inrawlh, tiin Damle thlavang hauhna thu a sawi.