JNU-in fee tihsanna tur a sut Ṭhen

Delhi-a Jawaharlal Nehru University (JNU) zirlaiten  hostel fee tihsan, hostel hawn leh khar hun (time) leh thawmhnaw hak dan tur chungchanga inthununna siam duh lohna lantira nawrh an huaihawt hnuah, JNU executive council chuan fee tihsanna tur chu a sut.

"JNU Executive Committee chuan heng zirlaite thil phut hi ngunthluk taka kan ngaihtuah hnuah, fee  tihsan tumna chu sut a ni a, hemi rual hian zirlai rethei zawkte puihna tur scheme siam rawt a ni bawk," tiin higher education secretary R. Subrahmanyam chuan a sawi. Fee tihsanna tur sut a nih leh tak avangin zirlai nuarte pawh class kal chhunzawm tawh turin a ti nghal bawk. 

JNU zirlaite chuan fee tihsan tum a nih hian zirlaite a nghawng dawn thu leh, JNU zirlai 27% hi thla khata cheng 6,000 aia tlem lalut chhungkua amite an nih thu leh, zirlai 40%-te chu thla khata Rs. cheng 10,000 ai tlem lalut an nih thu an tarlang. 

Hetihlai hian zirlaite chuan fee tihsan­na sut tum a nih dan an zirchian hnuah, zirlai zinga below poverty line (BPL) chauh huamtir tum a nih avangin he thil hi an pawm lo tih sawiin, nawrh huaihawt chhunzawm zel an tum thu an sawi.