Karnataka-a MLA aṭanga hnawl 16 ten BJP zawm

Karnataka Assembly Speaker hlui, KR Ramesh-a'n July thlaa MLA an nihna a lo hnawlsak, Congress leh Janata Dal (Secular) party MLA 17 zinga 16-te chuan nimin khan Bharatiya Janata Party (BJP) an zawm. 

Speaker hian July 25 leh 28 khan Tenth Schedule, anti-defection law hnuaiah MLA 17-te hi MLA an nihna a hnawlsak a, kum 2023 a tawp tur, Assembly term kal mek hun chhunga inthlan neihah an chuh a khapsak bawk a ni. Mahse MLA hnawl takte hi Supreme Court-ah an zualko a, court chuan disqualify an nihna hi thlawp mah se, December thlaa  by-election neih turah erawh an chuh phalsak a nih thu Nilaini khan a sawi. 

Supreme Court thutlukna tihchhuah a nih hnuah, MLA disqualify 17 zinga 16 hian BJP an zawm nghal a, nimin khan Bengaluru-a BJP office-ah lakluh an ni.