Sena-NCP-Congress-in ṭangrual Sorkar siam dawn : Sharad Pawar

Maharashtra-ah sorkar thar a din theih loh avanga President's Rule puan a nih hnuah, Nationalist Congress Party (NCP)  hotu Sharad Pawar chuan Shiv Sena, NCP leh Congress ṭangrual sorkar a ding dawn a, term pawh an hmang full ngei dawn tih a sawi. 

October thlaa assembly inthlan neihah khan party mala sorkar siam thei an awm lo. Seat la hnem ber BJP chuan ṭangrual sorkar a siam theih loh thu a tihchian hnua Governor Bhagat Singh Koshyari chuan Shiv Sena leh NCP-te pawh sorkar siam turin a sawm leh tawh bawk. Mahse hun tiam chhunga sorkar siam thei an awm loh avangin, Governor rawtna angin Thawhlehni khan president Ram Nath Kovind chuan Maharashtra chu President's Rule hnuaiah a dah ta a ni. 

NCP hotu Pawar chuan inthlan ṭhat buatsaih ngai loin, Shiv Sena, NCP leh Congress party-te chuan ṭangrual sorkar turin inbiakna pawh an nei tawh tih sawiin, vawiin hian party pathum aiawhte hian Governor hmuin, sorkar an siam theih tur thu hi an hrilh dawn a ni, a ti. 

BJP hruaitu leh chief minister hlui Devendra Fadnavis-a'n party pathumte ṭangrual sorkar siam chuan thla ruk bak a daih dawn lo tia a sawi chu chhang let nghalin, Pawar chuan term an hmang tluan ngei dawn tih a sawi.  

Shiv Sena-ten term pumin chief minister post chelh an phut nia sawi chungchang pawh an ngaihtuah dawn tih a sawi bawk. Pawar hian CM post hi inchelh chhawk turin a tirah chuan a rawt nia sawi a ni. Hetihlai hian NCP hruaitu dang, Nawab Mallik chuan Sena hian BJP nena an thawhdunna an titawp a, hei vang hian an zahawmna lo vawnnun sak chu an tihtur a ni ve tiin, CM dinhmun chu Shiv Sena-te chan tura a ngaih thu a sawi a ni. Hemi rual hian CM dinhmun chu Shiv Sena-te chanpuala dah a, deputy chief minister dinhmun chu NCP leh Congress-in inchelh chhawk tura rawt chungchang pawh ngaihtuah mek a nih thu leh, party pathumte inkara harsatna a awm loh thu a sawi bawk. 

Vawiin tlai dar 3-ah party pathum aiawhte hian Governor Kohsyari an hmu dawn a ni. Seat 288 awmna, Maharashtra assembly-ah hian BJP chuan seat ngah berin seat 105 a nei a, Shiv Sena-in seat 56, NCP-in seat 54 leh Congress-in seat 44 an nei. Sorkar siam tur chuan seat 147 neih phak a ngai dawn a ni. 

BJP leh Shiv Sena hi thawk­dunin sorkar hmasa pawh lo siam dun tawh mah se, sorkar thar siam turah Shiv Sena hian chanpual inzat, 50:50a insem a phut a, hei hi BJP lam chuan pawm thei loin an thawhdunna an titawp a, central-a BJP kaihhruai NDA sorkara Shiv Sena-in union minister a neihchhun, Arvind Swanat pawhin a lo ban phah tawh bawk.