Zirna in tihchangtlunna tur scheme AP-ah hawng
Children's day pualin November 14 khan Andhra Pradesh chief minister YS Jagan Mohan Reddy chuan an state chhunga zirna in tihchangtlunna tur, 'Mana Badi Nadu Nedu' scheme a hawng.
He scheme thar hian sorkar sikul 45,000 a huam dawn a, heng a huam chinte hnenah hian kum thum chhung atan an zirna in tihchangtlun hna thawh tur a ni. He scheme atan hian Rs. vaibelchhe 12,000 ruahman a ni bawk.
Zirna in tihchangtlun a nih theih nan he scheme hnuaiah hian fan, eng, blackboard, ṭhutthleng leh dawhkan, sikul hungna, zun in leh ek in, classroom thawmṭhat, tui thianghlim intur leh zirlaiten sap ṭawng an thiam chak theih nan English lab dah tum a ni.
He scheme hi thawh thuma kalpui tum a ni a, a thawhkhatnaah chuan sorkar sikul 15,715-te hnenah kalpui phawt a ni a nga, kum khat chhung atan Rs. vaibelchhe 3,500 dah a ni bawk. English, Telugu emaw Urdu ṭawng emaw chu Class 1-6 zirlaite'n an lak tel ngei ngei a ngai dawn a ni. Heng bakah hian mid-day meal ṭha zawk, zirlaibu, uniform leh pheikhawk-te chu zirlaite hnena sem chhuah theih tura ruahmanna kalpui a ni.
"Khawvel changkannain min nangchin zel a, chuvang chuan nakin zela kan hmasawn theih nan sapṭawng thiam hi a pawimawh a ni," tiin chief minister YS Jagan chuan a sawi. Nakkum January 9-ah scheme thar 'Amma Vodi' chu an state-in a hman dawn thu YS Jagan chuan a sawi bawk.