Parliament thlasik ṭhutkhawmah Eptu pawlten Farooq Abdullah tel ve phut

Parliament thlasik ṭhut­khawm chu vawiin aṭang hian ṭan a ni dawn a, hemi pual hian nimin khan all-party meeting koh niin hetah hian eptu lam chuan Farooq Abdullah tel ve an phut tih an sawi.

Nimina all-party meeting-ah hian prime minister Naren­dra Modi pawh a telin eng chungchang pawh he thlasik ṭhutkhawmah hian a len dawn thu a sawi. Eptu lam chuan Lok Sabha MP hren mek Farooq Abdullah chu House-a a ṭhut ve phalsak an phut nghal a ni.

All-party meeting hi sorkar laipui kaihhruaina hnuaiah neih a ni a, eptu lam hian economic tlakhniam chungchang, hna chan chungchang leh loneitute harsatna chungchangte sawi an phut tih Lok Sabha-a Cong­ress leader Adhir Ranjan Chowdhury  chuan a sawi.

Farooq Abdullah chung­changah hian National Con­ference MP Hasnain Masoodi chuan Abdullah a tel ngei theih nan sorkar chuan hma a la tur a ni, a ti. "Engtin nge dan lo taka parliamentarian hren a nih theih? Parliament-ah a ṭhut phalsak a ni tur a ni," tiin Rajya Sabha-a eptu pawl hruaitu  Ghulam Nabi Azad  chuan a sawi bawk.

Congress chuan  finance minister hlui P Chidambaram chu Parliament-a a ṭhut ve an phut bawk. INX Media case vanga Tihar Jail-a tang mek P Chidambaram chu thlasik ṭhutkhawmah House-ah a ṭhut ve phutih, MP zawng zawngte chu session-ah hian an tel vek tur a ni, an ti.

All-party meeting-ah hian Narendra Modi bakah hian BJP chief Amit Shah leh eptu minister eng emaw zat an tel.

Parliamentary Affairs Minister Pralhad Joshi chuan Maharashtra-a BJP nena thawkdun ṭhin, Shiv Sena ten an thawhdunna titawp a, Congress leh Nationalist Congress Party te thawhpui dan tur a ngaihtuah mek avang te, central-a Shiv Sena minister awmchhun a ban tak avang tein Shiv Sena chu Parliament session neih leh tur aṭang hian eptu lamah an ṭhu tawh dawn tih a sawi. 

Maharashtra-a BJP-Shiv Sena thawhdunna an tihtawp hnuah, Shiv Sena MP Arvind Sawant chuan union council of minister a nihna aṭangin a bang a ni. Shiv Sena chuan Parliament thlasik ṭhutkhawm neih hma nia NDA-a tel party hrang hrangten meeting an neih turah pawh an tel dawn lo tih a lo sawi tawh bawk. 

Rajya Sabha-ah chuan Shiv Sena MP pathumte chu eptu pawl lama an ṭhutna tur tihfel a ni tawh a, Lok Sabha-ah erawh an la tifel lo. Mahse session neih hunah chuan tihfel hman tum a ni.