R-Day lawmnaah Brazil President khuallian a ni dawn
Nakkum January 26-a Republic Day lawmnaah Brazil President Jair Bolsonaro chu khuallian a ni dawn.
Narendra Modi hian kar kal taa Brasilia-a BRICS (Brazil-Russia-India-China-South Africa) Summit hmanga a kalnaah, Bolsonaro hi khuallian turin a awm a, ani pawhin a sawmna hi lawm takin a lo pawm tih external affairs ministry thuchhuah chuan a tarlang.
Ram pahnih hruaitute chuan an inṭhianṭhatna lantirna hun remchangah an ngai tih an sawi a ni. Nakkum January 26-a India Republic Day lawmnaa a rawn kal tur hi Bolsonaro-a'n Brazil president a nih hnua India ram a tlawhna hmasa ber tur a ni. Republic Day lawmnaa Brazil president, khuallian ni thei pathumna a ni dawn bawk. Kum 1996 khan Fernando Cardoso leh kum 2004 khan Luiz Inacio Lula da Silva te chu khuallian an lo ni tawh bawk.
Modi leh Bolsonaro te hian Brasilia-a an inkawmnaah hian ram pahnihte thawhdunna tur zau zawk siam dan tur hrang hrangte an sawidun. Modi chuan tunhnaia Brazil sorkarin India mite, Brazil ram tlawh turte tan visa tel loa an kal phalsakna tur a siamsak chu lawmawm a tih thu a hrilh bawk.
October thla khan Bolsanaro chuan India leh China mi, tourism leh business vanga Brazil ram tlawh tumte tan visa an phut kher tawh dawn lo tih a sawi a ni.