Supreme Court-in Shaheen Bagh-a Nawrh huaihawtte insawn turin a ti
Supreme Court chuan nimin khan thuchhuah siamin Shaheen Bagh-a Citizenship Amendment Act, 2019 duh loa kawng danga nawrh huaihawt mekte chu an kawng dan titawp turin a ti a, hmundanga nawrh huaihawt turin a ti bawk.
Justice Kaul chuan, "Mipuite hian an duh lohna tilang tur hian dikna chanvo an nei lo kan ti lo. Zawhna awm zawk chu hei hi a ni, khawiah nge an nawrh? tih zawk hi," tiin a sawi.
Hearing an neih hnuhnun berah apex court hian nawrh huaihawtte hi hmundanga insawn turin a ti a ni.
Justice S K Kaul leh K M Joseph-te kaihhruai bench chuan vantlang kawng chu dan theih a ni lo tih sawiin, vantlang kawngah chuan tiam chin awm loa nawrh a huaihawt ngawt theih loh a ni, an ti. Nawrh an duh a nih chuan hmundangah an buatsaih theih tih an sawi bawk.
Bench chuan nimin khan senior lawyer pahnih, Sanjay Hegde leh Sadhana Ramachandran-te chu Shaeen Bagh-a nawrh huaihawt mekte bia a, palai hna thawk turin a ruat nghal bawk.
Shaheen Bagh-a nawrh huaihawtte hi thla hnih chuang an nuar tawh a, a tam zawk hi hmeichhia an ni nghe nghe. Kawngpuiah te an inkulh avangin mipui teivelna kawngah harsatna a thlen phah nasa hle. Pathianni khan union home minister Amit Shah chenna in panin duh lohna lantira kawng zawh an tum a, mahse Delhi police-te'n phalna an pek loh avangin an ṭhulh lailawk a ni.