India-in UN secretary general thusawi pawm lo

Pakistan-a cham mek UN secretary general Antonio Guterres chuan Pathianni khan Jammu & Kashmir (J&K) chungchanga India leh Pakistan inbe tura a tih chu India chuan a hnawl thu Ministry of External Affairs (MEA) thupuangtu Raveesh Kumar chuan a sawi.

Kumar chuan J&K chu India ramchhung a nih thu sawiin, J&K chungchanga inbiakna nei tura ramdangte inrawlh ṭhin chu a rem loh thu a sawi. Pakistan khawpui Islamabad-a 'Sustainable Development and Climate Change' hmang tura kal Guterres hian J&K chungchang chu sawichhuakin, Pakistan leh India inrinaa firfiaka chetna awm ṭhin avanga ramria khawsate chunga harsatna thleng ṭhin chu tihtawp anih theih nan leh, ram pahnihte inkara inhrek tawnnate chu tihtlem a nih theih nan ram pahnihten inbiakna neih a ṭul thu a sawi. Inbiakna neih an rem tih tawn phawt chuan puih a hreh loh thu Guterres chuan a sawi bawk a ni.

J&K-a mihring chengte dikna leh an zalenna chu humhalh sak a nih theih nan hmalak a ṭul thu Guterres chuan Islamabad-ah hian a sawi lang bawk a ni. Heng a thu sawite hi India chuan ngai thei loin, ramchhung thilah ramdang inrawlh a rem loh thu MEA chuan thuchhuah a siam ve nghal a ni.

Ni li chhung cham tura Pakistan-a zin mek Guterres hi Pakistan-a a cham chhung hian Afghan refugees international conference a hman pui nghal dawn bakah, Gurdwara Kartarpur Sahib a thlawh nghal bawk ang.