Allergy neite Covishield vaccine la lo turin ti
Serum Institute of India chuan Covid-19 vaccine an siam, Covishield ingredient zinga allergic neite chu he vaccine hi la lo turin a ti.
Covishield vaccine ingredient pawh Serum Instiute chuan an website-ah tarlangin, "L-Histidine, L-Histidine hydrochloride monohydrate, Magnesium chloride hexahydrate, Polysorbate 80, Ethanol, Sucrose, Sodium chloride, Disodium edetate dihydrate (EDTA), Water for injection," te an tel tih a sawi.
Vaccine siamtu chuan an hriselna dinhmunte pawh vaccine an lak hma hian heathcare provider hnena hrilh vek turin a ti bawk. Nu naupai lai leh nau hnute pe lai pawhin vaccine lak hma hian an hrilh tur a ni, a ti. Ram pumah Covid-19 vaccine, Covaxin leh Covishield pek chhuah thawh khatna kalpui mek a ni a, a thawh khatnaah hian healthcare leh frontline worker-te pek an ni. Thawh khatnaah hian vaccine hi mi vaibelchhe thum vel hnenah pek an ni dawn a, vaccine man hi sorkar laipuiin a tum vek a ni.
Mi 3,81,305 hnenah vaccine pe tawh
India ramah kar liam ta Inrinni aṭang khan Covid-19 vaccine pek chhuah ṭan a ni a, Thawhṭanni tlai thleng khan mi 3,81,305 hnenah vaccine hi pek an ni tawh tih union health ministry chuan a sawi.
Health ministry-a additional secretary Manohar Agnani chuan Thawhṭanni khan state leh UT 25-ah mi 1,48,266 hnenah vaccine hi pek leh a ni tih sawiin, vaccine dawng tawh zingah harsatna tawk, adverse events following immunization (AEFI) hi mi 580 an awm tawh a, an zinga pasarih chu damdawi-ina dah an ni tih a sawi bawk. AEFI awm zingah pawh harsatna lian tham tawk an awm lo a, damdawi-ina dahte pawh an ngaihtuahawm lutuk lo nia sawi a ni.
Thla 7 chhunga hri kai thar tlem ber ni thleng
Thawhṭanni khan ram pumah Covid-19 hri kai hmuh thar mi 10,064 an awm a, thla sarih chhunga ni khata hri kai hmuh thar an tlem ber ni a ni. Hemi ni vek hian hripui vanga thi mi 137 an awm a, hei hi thla riat chhunga ni khata hri vanga thi an tlem ber ni a ni ve bawk.
Hri kai hmuh tawh zinga 96.66% chu enkawl dam an ni tawh a, hetih lai hian 1.44% erawh chuan hripui hi an thihpui thung. Hri kai enkawl mek hi nuai thum an tling tawh lo. India rama Covid-19 hri kai hmuh hmasak chu Kerala mi niin kum 2020, January 30 khan hri a kai tih hi hriat a ni.