Loneituten kum 2024 May thla thleng nawrh inhuam
Bhartiya Kisan Union (BKU) hruaitu Rakesh Tikait chuan loneituten farm law thar duh lohna lantira nawrh an huaihawt mek chu kum 2024 May thla thleng kalpui turin an inhuam tih a sawi.
Delhi border-a loneituten nawrh an huaihawt mek chu 'ideological revolution' tia sawiin, Tikait chuan an thil phutte tihhlawhtlin a nih hma chuan Lok Sabha inthlanpui neih leh hun tur, kum 2024 May thla thlenga nawrh huaihawt turin an inpeih reng tih a sawi a ni.
Loneitu hausa zawkten an fuih avanga nawrh huaihawt nia sawi chungchang chu thu dik lo a ni tih sawiin, Tikait chuan thingtlang khuaa mi leh loneitu pawl hrang hrangte chuan he nawrh hi an thlawp a ni, a ti. Farm law sut tura sorkar an phutnaah sorkar lam chuan a ṭanhmun a la sawn duh lo a, hei vang hian nawrh pawh hi an la kalpui zel dawn tih sawiin, hemi rual hian an nawrh huaihawt thlawptute chuan thubuai neih leh man tawh pawh an inhuam an ngai tih a sawi.
Inbiak ṭum 10-na neih hun sawn
Loneitu leh sorkar laipui aiawhte inremna kawng zawnga inbiak ṭum 10-na, nimina neih an tum chu vawiin atan sawn a ni. Vawiin chawhnu dar 2-ah Vigyan Bhavan-ah an inbe dawn a ni.
Union agriculture minister Narendra Singh Tomar chuan loneitute hnenah hian farm law chungchanga an thil phut chu sorkar laipuiah a draft thehlut tura tih an nih thu a sawi a, hei hi sorkar lam chuan rilru inhawng takin a lo ngaihtuah dawn a ni, a ti.