Chief Justice of India thar Sharad Arvind Bobde lalut

Justice Sharad Arvind Bobde chu Chief Justice of India (CJI) 47-na atan nimin khan Rashtrapati Bhavan-a Durbar Hall-ah rinawmna thu tiam tirin, President Ram Nath Kovind chuan a lalut.

Pathiannia CJI hlui Ranjan Gogoi a pension hnuah, kum 63 mi Bobde hi a thlaktu atan nimin khan lak luh a ni ta a ni. Thla 18 chhung, kum 2021 April 21 thleng he dinhmun hi a chelh ang. Chief Justice thar lakluh inkhawm hmanpuite zingah hian prime minister Narendra Modi, vice president Venkaiah Naidu, home minister Amit Shah, finance minister Nirmala Sitharaman leh CJI hluite pawh an tel. 

Maharashtra-a Nagpur-ah Bobde hi kum 1956 April 24 khan a piang a, SFS College Nag­pur aṭanga a graduate hnuah Nag­pur University aṭangin Law a zir chhuak. Hemi hnu, kum 2000 khan Bombay High Court-ah additional judge hna thawkin, 2012 khan Madhya Pradesh High Court-ah Chief Justice hna a chelh bawk. 

Kum 2013 aṭangin Supreme Court-ah judge hna a chelh a, Ayodhya temple-mosque buaina chungchangah te, BCCI case leh firecracker hman khap chungchanga thubuai ngaihtuahtute zingah Bobde hi a tel a ni. Bobde hi judge zinga senior ber niin, CJI kalchhuak ta Ranjan Gogoi khan sorkar laipui hnenah CJI atana rawtna a thehlut a, Law Minister chuan Prime Minister hnenah thlenin, a tawpah President hnena thlen a ni. CJI atan hian Supreme court-a judge senior ber ruat a ni ṭhin.