Parliament Winter Session ṭan

Parliament Winter Session chu nimin khan ṭan a ni a, Lok Sabha leh Rajya Sabha-ah member thite sunna hun hman a ni. Session hian December 13 thleng a awh dawn a, rorel inkhawm ṭum 20 an nei ang. 

Winter Session chhung hian Parliament hian bill 35 a ngaihtuah hman beisei a ni a, heng zingah hian sawi hlawh tak Citizenship (Amendment) Bill 2019 leh Personal Data Protection Bill te pawh an tel. Bill tihkhawtlai mek hi 43 a awm bawk a, heng zinga 12 chu  ngaih­tuah ṭhat leh tura tih niin, pasarih chu hnuhdawh tura tih a ni bawk. 

Lok Sabha 

Lok Sabha-ah chuan member thar lakluh leh member thite sunna hun hman zawhah, Congress party leh eptu party dang­te chu Well-ah chhuakin, an lungawi lohna hrang hrangte an aupui zui nghal.  

Question Hour hman a nih veleh, Congress member 30 vel chu Well-ah kalchhuakin, BJP kaihhruai NDA sorkar chu dawt hmanga eptute a beih ṭhin titawp tura an phut thu an sawi. Hei bakah hian eptute chuan Jammu and Kashmir chief minister hlui Farooq Abdullah pawn chhuak thei loa hren a la nih chungchangte an sawichhuak bawk. 

BJP thawhpui ṭhin, tunhnaia Maharashtra-a ṭangrual sorkar tum chungchanga an inrem theih loh avanga an thawhdunna titawp ta, Shiv Sena member-te pawhin loneitute harsatna tawh mek chinfel sak dan ngaihtuah tura sorkar an phut thu an aupui bawk. 

Hemi hnu hian Shiv Sena member-te chu House aṭangin an chhuak zui a ni. Speaker Om Birla chuan member lungawi lo, Well-a kalchhuakte chu an ṭhuthmun pan turin a ngen a, Question Hour zawh hnuah an thil duhzawng leh ngai pawimawhte sawichhuak turin hun a pek tur thu a sawi. Mahse heti chung hian eptu member-te chuan an ṭhuthmun an pan duh chuang lo. 

Rajya Sabha 

Rajya Sabha session vawi 250-na neihnaah, prime minister Narendra Modi chuan thu sawiin, mi rin loh takin Nationalist Congress Party (NCP) chu parliamentary dan an zawm ṭhat avangin a rawn fak. PM chuan party pahnih, NCP leh BJD te chu dan ṭha tak an zawm avangin a fak tih sawiin, lungawi lohna leh sawi duh an nei a nih pawhin Well-a chhuah kher loa an sawi avangin fakawm a tih thu a sawi. An lak aṭang hian party dangte chuan zir tur tam tak an nei a ni, a ti. 

Ṭum danga chairman chauhin member thite sunna thu a sawi ṭhin chu nimina Rajya Sabha inkhawmah hian tidang­lamin, chairman Venkaiah Naidu chuan political party hrang hrang hruaitute chu House member panga thite sunna thu sawina hun a siamsak.