JNU zirlai kawngzawhte dang

Fee tihsang chungchang avanga Jawaharlal Nehru University zirlai lungawi loten nimina Parliament thleng kawng zawh an tum chu police-te'n  Safdarjung Tomb bulah  an lo dang.

Zirlai kawng zawh zinga mi 50 bawr vel chu police-te hian an man a, an man zingah hian JNUSU President Aishe Ghosh pawh a tel. Zirlaite hian Parliament thleng kawng zawh a, ram hruaitute hnena an lungawilohna thlen an tum a ni. Mahse Parliament-a an luh theih loh nan police-te chuan Parliament luh theihna zawng zawngah an lo veng a ni. 

He thil thleng avang hian Union Human Resource Development Ministry chuan member pathum awmna panel dinin, UGC Chairman hlui Professor VS Chauhan, AICTE Chairman Professor Anil Sahasrabudhe leh UGC Secretary Professor Rajnish Jain a ruat a, he panel hian boruak muanawm a thlen theih nan thil awm dan leh hmalak dan tur an zirchiang dawn a ni.   

Kar kal ta Thawhṭanni aṭanga lungawi lohna lan tir, zirlaite hian Draft Hostel Manual chu duh loin, he draft-ah hian fee tihsan chungchang te, hostel hawn leh khar hun (time) leh thawmhnaw hak dan tur chungchanga inthununnate ziah lan a nih vangin an lungawi lo a ni. JNU executive council chuan fee tihsanna tur chu a sut ṭhen tur thu sawi mah se, zirlaite chuan fee tihsanna sut tum a nih dan an zirchian hnuah, zirlai zinga below poverty line (BPL) chauh huamtir tum a nih avangin he thil hi an pawm lo tih sawiin, nawrh hi an la chhunzawm a ni.