Parliament Session : Gandhi chhungkua SPG cover tihtawp chungchang sawichhuak
Parliament winter session ni hnihna, nimina neihah Congress party chuan Lok Sabha-ah sorkar laipuiin Gandhi chhungkua Special Protection Group (SPG) cover a pek a tihtawp sak chungchang sawifiah turin prime minister Narendra Modi leh home minister Amit Shah an phut.
Congress member-te chuan an party president Sonia Gandhi leh a fate pahnih, Rahul Gandhi leh Priyanka Gandhi Vadra-te chu an nunna tiderthawng thei thil an tawh fo laia, BJP kaihhruai NDA sorkarin SPG security cover a tihtawp sak chhan an hriat duh thu an sawi. Congress member-ten chhanna pe tura an phut lai hian union home minister Amit Shah chu House aṭang hian a chhuak a ni.
Sorkar laipui chuan Sonia Gandhi leh a fate SPG security cover hi titawpin, Z+ category hnuaiah a dah a, paramilitary Central Reserve Police Force (CRPF) ten an veng tawh zawk a ni. Congress member-te hian Question Hour laiin hemi chungchang hi sawichhuakin, Congress leh National Congress member 20 chuang chu Well-ah ah chhuak a ni. Speaker Om Birla chuan an ṭhutna hmun pan tura ngenin, loneitute chungchang an sawi hun a nih thu a hrilh.
Mahse eptu member-te chuan Prime Minister chhanna an duh thu leh, politics-a phuba a lak ṭhin tihtawp tur te, dictatorship tihtawp leh rorelna dik an duh thute an anpui chhunzawm a, hemi hnu hian Congress member-te hi Lok Sabha aṭangin an chhuak zui bawk.
BJP kaihhruai sorkar laipuiin Gandhi chhungkuate SPG security cover a tihtawp sak hi a hma pawhin Congress party chuan na takin a lo sawisel tawh a, mimal taka an laka phuba lak a tumnaah an puh. Congress worker-te pawhin home minister Amit Shah chenna in kawtah lungawi lohna an lo lantir tawh a ni. Kum 1991, October thlaa prime minister hlui Rajiv Gandhi thah a nih hnu lawk aṭang khan a nupui leh fate hi SPG security cover hi pek an ni.
Speaker Birla chuan Lok Sabha-ah member-te an thil phut leh lungawi lohna an sawi a nih pawhin, an ṭhuthmun aṭanga sawi mai tur leh Well-a chhuah khawm a remtih tawh dawn loh thu a sawi. Speaker chuan Well-a kalchhuakte chungah chuan action a la zel dawn tih a sawi.