J&K chungchang avanga bang IAS officer-in a hna zawm tum tawh lo

Jammu and Kashmir special status pekna, Article 370 tihtawp a nih vanga sorkar laipui chet dana lungawi loa India Administrative Service (IAS) officer a nihna aṭang bang, Kannan Gopinathan chu a hna zawm leh tura tih a nih hnuah pawh a zawm dawn lo tih a sawi. 

Kannan Gopinathan hi Aizawl District Collector (DC) hlui a ni. Sorkarin a hna zawm tura a hriattir hnuah, Gopinathan hian a hna chelh chhunzawm aiin, India ram chu dinhmun hlauhawma a din thu sawi a, ramchhung state hrang hranga campaign a neih mek chhunzawm a duh zawk thu a sawi.

Daman and Diu leh Dadra and Nagar Haveli-a Power Department-a secretary hna a chelh laiin, Gopinathan hi August 21 khan a hna ṭangin a bang a ni. Personnel Department of Daman and Diu chuan a banna hi pawm loin, a hna chelh turin an ko leh a ni. 

Kum 33 mi Gopinathan hi a hna ṭang a banna thla thum a liam tawh a, sorkar chuan a banna hi a la pawm lo. "IAS hna hi kum sarih chhung ka theihtawpa ṭhain ka thawk a, ka sulhnu chuan min awmpui reng a ni, tuman min laksak lo ang," tiin Gopinathan chuan IAS a nih chhunga a hnathawh ṭhatnate a sawi chhuak.    

Gopinathan hi IAS officer kum 2012 batch, AGMUT cadre a ni. August 5-a Jammu and Kashmir special status Article 370 hlih a nih avang khan lungawi loin a hna aṭangin a bang a ni.