Ram pumah NRC kalpui a ni dawn: Amit Shah

Union home minister Amit Shah chuan nimin khan Rajya Sabha-a thu a sawinaah, ram pumah National Register of Citizens (NRC) kalpui a nih dawn thu sawiin, mipuite tan hlauh tur a awm lo tih a sawi nghal bawk.

"NRC-ah hian eng sakhua emaw telh loh tur tih engmah a awm lo. India khua leh tui zawng zawng chu eng sakhua pawh ni se NRC list-ah an tel ang. NRC hi Citizenship Amend­ment Bill nen a danglam a ni," a ti. NRC chu ram pumah kalpui a nih dawn thu sawi bawkin, eng sakhua tan mah manganna chhan tur a awm lo a, mi zawng zawngin NRC an neihna mai tur a nih thu sawiin, sakhua enhran leh tihbik a awm dawn lo tih a sawi. 

Shah chuan Supreme Court thupek angin NRC hi Assam state-ah kalpui a ni tawh tih a sawi. Assam NRC final list, August 31-a tlangzarh a nih khan mi nuai 19 chuang an tel lo a, hemi a nih avang hian mi tam tak chuan an hlau hle a ni. List-a tel lote hian tribunal-ah an thlen leh thei tih sawiin, hemi buaipuina tura pawisa nei lote chu Assam sorkarin sumin a pui zel dawn a ni, a ti. Hetihlai hian state tam tak chuan khua leh tui dik tak finfiaha an awm theih nan leh, dan loa an state-a awmte hriatchhuah an nih theihna turin kalpui an phut ve thung.

BJP sorkarna state ṭhenkhat- Uttarakhand, Haryana, Uttar Pradesh leh Jharkhand-te chuan Assam NRC ang hi an state-ah an kalpui ve dawn thu an puang tawh bawk.